ஆசியக் கிண்ண டி20 கிரிக்கெட் தொடரில் மிர்புரில் இன்று நடைபெற்ற ஆட்டத்தில் ஐக்கிய அரபு அமீரக அணியை 7 விக்கெட்கள் வித்தியாசத்தில் பாகிஸ்தான் வீழ்த்தியது.இதில், முதலில் துடுப்பாட்டத்தை தெரிவு செய்த அமீரக அணியில், துவக்க வீரர்கள் ரோகன் முஸ்தபா, முகமது கலீம் ஆகியோர் தலா ஒரு ஓட்டத்தில் ஆட்டமிழந்தனர்.
முகமது சமீத் 5 ஓட்டங்களும், உஸ்மான் முஸ்தாக் 9 ஓட்டங்களும் எடுத்து ஆட்டமிழந்தனர். 41 ஓட்டங்களுக்குள் 4 விக்கெட்டுகளை இழந்து தடுமாறிய அதேசமயம், 4-வது வீரராக களமிறங்கிய ஷாய்மன் அன்வர் அபாரமாக விளையாடி ஸ்கோரை உயர்த்தினார்.குறிப்பாக அப்ரிடி, முகமது நவாஸ் ஆகியோரின் பந்துவீச்சை துவம்சம் செய்த அவர் 46 ஓட்டங்களில்
ஆட்டமிழந்தார்.
அவரைத்தொடர்ந்து முகமது உஸ்மான்-கேப்டன் அம்ஜத் ஜாவேத் ஜோடியும் பொறுப்புடன் விளையாடியது.
முகமது உஸ்மான் 21 ஓட்டங்களில் விக்கெட்டை இழக்க, 20 ஓவர் முடிவில் அமீரகம் அணி 6 விக்கெட் இழப்பிற்கு 129 ஓட்டங்கள் எடுத்தது.அஜ்மத் ஜாவேத் 27 ஓட்டங்களுடனும், முகமது நவீத் 10 ஓட்டங்களுடனும் களத்தில் இருந்தனர். பாகிஸ்தான் தரப்பில் முகமது அமிர், முகமது இர்பான் ஆகியோர் தலா 2 விக்கெட் கைப்பற்றினர்.
இதையடுத்து 130 ஓட்டங்கள் எடுத்தால் வெற்றி என்ற இலக்குடன் பாகிஸ்தான் அணி களமிறங்கியது.முகமது ஹஃபிஸ் மற்றும் சர்ஜெல் கான் ஆகியோர் துவக்க ஆட்டக்காரர்களாக களமிறங்கினர்.ஆட்டத்தின் 2வது ஓவரிலேயே சர்ஜெல் கான் மற்றும் மன்சூர் ஆகியோர் அடுத்தடுத்த பந்துகளில் ஆட்டமிழந்தனர். ஹஃபிஸும் 11 ஓட்டங்கள் எடுத்த நிலையில் ஆட்டமிழந்தார்.
எனினும் பின்னர் இணைந்த உமர் அக்மல் மற்றும் சொயப் மாலிக் இணை அணியை வெற்றி பாதையை நோக்கி அழைத்து சென்றது.இறுதியில் 18.4 ஓவர்களில் 3 விக்கெட்டுகள் இழப்பிற்கு 131 ஓட்டங்கள் எடுத்து பாகிஸ்தான் வெற்றி பெற்றது. அக்மல் 50 ஓட்டங்களுடனும் சொயப் மாலிக் 63 ஓட்டங்களுடனும் ஆட்டமிழக்காமல் களத்தில் இருந்தனர்.
Post a Comment